Cenàbbriu e rrussettu

Nna fiata a ll'àrciprèite te Lucugnanu ni capetàu cu cunfessa, standu chiusu ntra llu cunfessiunile, nna cristiana, e nu nni riuscìu cu lla canusca, mancu te la uce; aìa bèssere quarche furestera mmaretata te picca cu nnu lucugnanese.

- Reverendu, ci me mintu nnu picca de cenàbbriu alli musi, nnu picca te russettu alli mili te la facce, fazzu peccatu ressu?

- Tipende te la ntenzione - spiecàu lu saggerdote - Ete peccatu ci te tingi cu lla mera cu attiri li màsculi, nun ete peccatu ci…

- Me mintu lu cenàbbriu e lu russettu sulamente cu lla ntenzione cu pargu cchiùi ngrazziata.

Papa Caliazzu nde scustàu la tendina, cacciàu la capu fore te lu cunfessiunile, respicàu bona bona δδa cristiana e disse:

- Sine, soru mia, tìngite musi e facce; te pueti puru nquacchiare de cenàbbriu e de russettu, tantu cu sta facce uèmmeni nu nde mmachi!