Lu ciùcciu scerratizzu

Lu ciùcciu te papa Caliazzu, ca se chiamàa Cusiminu, era nna bona èstia: tenìa suli sei anni, stìa buenu a carni, mangiàa picca, era spiertu te pieti ma nu bera caucinaru; tenìa nnu sulu tifettu: quandu lu patrunu nci se chiantàa te subbra, te lu bellu bellu se sçenucchiàa e se stendìa a nterra.

L'acciprete nu pputìa cùrrere risçu cu sse stocca ogneffiata nn'anca o cu rresta fermu a mmetà strata, e pe quistu decise cu llu a' binde alla fera rande te Misçianu.

Nnu ellanu ni menàu nn'ècchiu: ni ausàu le rìcchie, ni uardàu li tienti, ni tastàu le còstule, lu teràu pe cuta; ni piazze, lu truàu a postu…, ma pe nnu buenu quartu d'ura tracchisçiàu nanti e rretu, poi se cucchiàu e cuntrattàu.

Lu cuntatinu, però, tenìa lu cervieδδu finu e pe quistu, petòtecu comu era, nu sse ccuntentàu te nna strinta te manu, ma ose nnu cuntrattu scrittu e suttascrittu, ddu tecìa ca lu sumaru nu tenìa scusu nisciunu ìzziu.

Lu patrunu, ca era puru iδδu piulusu, pe lla precisione te lu cuntrattu ose cu nci scria pròpriu ste palore: "Lu ciùcciu Cusiminu te papa Caliazzu tene nnu sulu tifettu: ognettantu se scerra".

Lu ellanu se mise a rrìtere e, puru cu ffazza lu spiritosu, disse:

- Certu ca nnu ciùcciu se scerra; ca ci nu sse scerràa, cce ciùcciu era? - e se la retìu.

Poi tira a mie e tira a tie, ete picca e bete marcatu, an fine chiutèra lu cuntrattu: unu pacàu, za za!, sessantatoi tucati; l'àutru, mena mena!, se li feccàu ntra lla mariola.

Nun aìa ncora lassata la fera, ci papa Caliazzu se idde te facce lu cuntatinu cu llu ciùcciu Cusiminu.

- Acciprete, stu ciùcciu ogne centu passi ttoppa e cate; cce pascali te èstia ete? Na, na, ièu te dau lu ciùcciu tou, tie me dai li sordi mei.

- No, cumpare - respuse papa Caliazzu - cosa enduta nu sse torna.

- No, caru a signurìa, carta canta… Lieggi cquài ci tice ca lu sumaru nu à ttenìre nuδδu tifettu scusu e nvece lu ciùcciu tou tene lu ìzziu ca cate.

- Ma, ci cate, tipende te lu fattu ca lu ciùcciu se scerra cu mmoa prima nn'anca e poi l'àutra, se scerra e le mina tutte doi te unita, li pieti se tòzzanu, se mbrìgghianu e lu Cusiminu cate. Ci se scerra, cce nci pueti fare?

- E nu bete quistu nnu tifettu forte?

- Ma ièu t'àggiu vvertitu, et omu vvisatu è ttuttu sarvatu. Nu tte l'àggiu puru scrittu ca lu ciùcciu Cusiminu te papa Caliazzu tene lu ìzziu "ca ognettantu se scerra"? Cazzi toi, cumpare, e statte buenu!