Morte apparente

Perìcciu, lu pôru Angelantoni Santulequeri, lu truàra muertu intra a lla pagghiara de le Cuneδδe, mmera allu Spezzafierru. Siccomu nu stìa ssettatu mancu fratellu, lu Parasassi e lu Niceta cu doi àutri precamuerti lu chiùsera intra a cquattru tàule, mancu chianulisçiate bone, e senza cruna, senza banda, senza fratelli, ccumpagnatu de lu sulu Peppantoni Pizzinacu ca purtàa la Cruce e de papa Ronzu Tòtaru, lu trasèra ntra lla chèsia; l'arciprete cu lla stola a luttu ni nturtigghiàu te pressa a mpressa lu Miserere, ni strulecàu la Tiesilla, lu nzurfisçiàu cu ll'àcqua santa e, comu era l'usanza de δδi tiempi, lu lassàra pe lla notte intra llu cappellone te San Giseppu, stisu ntru llu baùgliu cu llu cupèrchiu scarassatu.

A menžanotte nnu spaccime te castarieδδu trasìu te nna fenèscia ca tenìa nnu itru ruttu, e se puggiàu susu alla frunte te l'Angelantoni cu nni nde càccia l'ecchi a cuerpi te pizzu.

Ma, meràculu te San Giseppu te la bona morte, lu muertu alla prima pezzecata se descetàu e alla secunda berescìu, comu nnu Santu Làzzaru.

Quistu lu fattu riale; fena a cquai ete la vera stòria - me la cuntàu prima nònnuma lu tata Luisçi Pagghiara e poi me l'assicuràu puru lu Icenzinu Peppàcchiu, ca abbetàa cùcchiu alla chèsia e nde foi testemòniu.

Nu sàcciu, nvece, ci àggiu crìtere o nun àggiu crìtere a ccenca sçìa cuntandu l'Angelantoni Santulequeri cu lla uce soa stessa: ièu bu lu cuntu, ui ci uliti cu ccretìti, cretìtinci, senone fazzaddìu.

L'Angelantoni mpunìa ca nu ll'ìa filu auta a caru cu rresùsceta e ca ìa preferitu mègghiu cu rrumagna muertu a δδammera a ddu già se truàa!

Lu muertu-iu, quasi uantànduse, sçìa ripetendu ca, passandu te nanti a nnu purtune tuttu nfumecatu, idde scrittu NFIERNU - UAI A CCINCA TRASE.

E cce uai putìanu essere mai, e cce pene? Ci era pe cquistu, mo', te uai, pene, sufferenze nd'ìa patute tante a nterra, ca quiδδe te lu nfiernu nu nni facìanu né càutu e né friddu. Tuttu era ci ni cummenìa cu ba' stèsçia de unita alli paisani soi caδδinari già muerti, parienti, cumpari, amici e canuscenti, ca certamente a mmurra stìanu a δδai, a llu nfiernu, belli allu càutu.

L'Angelantoni rrumase nnu menutu subbrapensieru, ma poi camenàu nnanti. Pe ccuriosità se fermàu cu llegga la nzegna a ddu nc'era scrittu BENVENUTU ALLE ANIME TE LU PURGATORIU; ibbe nna prima itèa cu ddummanda ci nc'era nnu postu lìbberu pe iδδu; ma puru sta fiata teràu nnanti.

Amici, nu sta' nventu nienti te capu mia, sapìti? Li nunni randi cuntàanu stu fattu: llu Mmelu Muδδìcula, la Rosa Sçattapignate, la Pia Pea, lu Ronzu Senzacarcagne giuràanu ca era veru e decìanu ca puru li prieti, papa Santu, papa Titta, papa Pascali, rrimanìanu sicchinnonni e maraegghiati, cu lla ucca perta comu veri maccabbèi!

L'Angelantoni rriàu an fine nnanzi a nna porta ndurata ma stritta stritta, a ddu subbra nc'era la scritta ABBERGU PARAISU; tuzzàu e se nfacciàu San Pietru lu portararu.

- Ci sinti? Comu te chiami?

- Me chiamu e suntu l'Angelantoni Santulequeri te Caδδinu.

- E cce ccumandi?

- Percisà percisà, nc'ete nnu postu rreservatu pe mmie?

- Ane, frate miu, ane! Tòrnatende sulla terra ca tie nnu muertu apparente sinti!

- Mai sia, San Pietru miu! Nu mbògghiu pròpriu cu tornua nterra, a δδu luecu te patimienti; suntu ècchiu te 56 anni…

- … sine, amicu, te cquassubbra etimu tuttu e de tutti li cristiani sapimu gnencosa pe filu e pe segnu. Pe cchiùi te mienžu sièculu la famòteca t'à' persecutatu, à' patuta la site de acqua e la site de mieru; t'à' scurpunatu fatiandu comu nnu ciùcciu te la matina alla sira; pe tutta la vita senza sordi a mpàuta; tante fiate, scazzecatu, ntra lle pagghiare scusi scusi…; mai nna fìmmena. Be, lassamu stare ste cose. Pe δδ'àutri mutivi, mo', le pene l'à' già scuntate; perciò trasi e sìi lu benvenutu tra li Biati!

«Sangu llu pìgghia! - cussine l'Angelantoni Santulequeri cuncrutìa lu fattu - Mmaletettu δδu castarieδδu! Pròpiu quandu ièu stìa cu ttrasu e tenìa nnu pete fore e l'àutru intra allu Paraìsu, δδu fetente te aceδδu me tese doi pezzecate a nfacce, me ddescetàu e me fice berescìre a cquài a nterra!»