29 - La suppiera

Nna fiata inne a ccasa allu Tore e alla Ngicca nnu parente loru, lu zu Pati, cu passa, nu sàcciu pe quali raggioni, ammenu nna semana cu nnepùtasa lu Tore ca, pe la precisione de li fatti, ni era puru suscettu de Sangiuanne.

Lu zu Pati era ècchiu ècchiu, purtàa li capiδδi ianchi ianchi e tenìa la barba longa longa; cu camina, se mpuggiàa a nna peròccula nnuti nnuti e liscia, percé le anche ni trabballanu e lu mantenìanu tisu a stienti; comu sçiunta, n'ìanu rrumasti nu cchiùi de uettu tienti scumbinati e (subbra alla tigna la capu malata!) alla manu ritta tenìa lu tremulizzu, de nn'ècchiu etìa picca e de l'àutru etìa picchi. Renduttu a sti stati e a ste cundizioni, ognettantu a llu Pati ni passàa pe lla capu ci se mentìa a fare lu lemosenante, ca, pe dire la verità, nu nni filu scummenìa.

La matina lu zu Pati de lu liettu se ausàa mprima e se sçia ssettàa susu a llu pesulu te coste allu ccale de la cisterna, e cussì rrimanìa sotu e fermu, uardandu fissu nterra. Ni se mmuìanu li pili spelazzati te li mustazzi sulu quandu lu Rasi se cucchiàa, lu salutàa "Caru zizzì" e ni tuccàa δδa manu tremulante.

Puru la secunda matina la Ngicca Cutrubbiera ni ndusse nna suppiera te cafè de uèrgiu bbrustulutu e nna feδδa de brunetta. Lu ecchiarieδδu mpuggiàu la scutella subbra alle anche, stringèndula tra lle sçenùcchie. Lu Rasi, però senza cu lla fazza a mposta, passànduni cùcchiu, ttuppàu alli pieti te lu zu Pati e nci buccàu susu; la suppiera catìu a nterra e se rumpìu a ttre stozze. Aìi buta ssèntere la Ngicca comu e cquante nde disse cu δδa uce de nn'aδδina ca à fattu l'eu! Dopu puru ci fìgghiusa lu Rasi ni fice ccapire ca soa ìa stata la curpa, màmmasa se la pigghiàu sulu cu llu zu Pati.

«Tore - chiamàu la Ngicca - uarda biti cce à cumbenatu stu mìnecu de zìuta».

«E, zu Pati de la matosca, e nnu tte stai ttentu? - lu nepute lu retàu - Puerti, sine, nna manu scema, ma dicu: cu nnu picca te ccurtezza…».

«Gnore miu, zzicca sta stozza te tàccaru te fica, pìgghia scarpieδδu e raspa e, caurtandu e raspandu comu sai tie, fanci nna ciòtula te legnu, senò stu cristianu, ci ncora à rrumanire cu nnui, me rumpe nna suppiera lu giurnu e me dessìndeca lu servìziu de piatti e tazze».

Lu Rasi ntantu, striu pe quantu ncora era, aìa cumpenetratu lu cuncettu de ccenca màmmasa e sirsa sçìanu strulecandu. E cce fice? Ccose li ttre cuperchi e se rruccàu a nn'àngulu, se ssettàu cu ll'anche perte su nnu chiancularu e se mise cu mpasta cu lla sputazza nnu picca te pùrvere de tufina; poi, beδδu miu, cu lle tìsçete cercàa cu bunisca le ttre stozze de crita te la cuppiteδδa.

Lu sire se nde ddunàu, se nde presçiàu e intra de iδδu allu fìgghiu sou ni disse puru "Brau, Rasi!"; poi se giràu alla Ngicca:

«Gnora mia, uarda cce tte sta' cumbina lu Rasi nèsciu…; sta' cconza la tazza rutta. Rasi, fìgghiu te lu tata tou, cce sta' faci?».

«Sta' ncoδδu sti cuperchi e sta' cconzu sta suppiera pe cquandu puru ui bu faciti ecchi!» - foi la resposta fina te lu Aràsemu.