36 - La cepuδδa te la patruna

E nu spramentàu, sai?, la Ngicca Cutrubbiera, cu presenta a lli mmitati δδa cazza te cepuδδa! Moi te nde cuntu nn'àutra curiosa, ca a mie me piace cu cuntu culacchi a ccinca sape rìtere de gustu.

La patruna Ngicca Cutrubbiera ìa chiamatu a ccasa soa pe doi ttrete giurni, comu tandu era l'abbetùtine de li bonatenenti, nnu mèsciu sulachianiellu cu llu tescìpulu, cu nni fazza menžettare le scarpe e li scarpini spundati soi e de marìtusa e de la cammeriera, e cu fazza ccunzare le burdacche e li scarpuni rutti e scusuti te li servitori soi.

A mmenžatìa la patruna presentàu a ntàula maccarruni fatti ccasa cu lla recotta sçante e marangiane a ffungitieδδi: se llapàra tuttu, benetica!, e se stusçiàra puru li piatti, senza mancu cu llàssanu la crianza leccese; la sira purtàu casu friscu e cepuδδe rrustute: bone puru quiste.

Lu giurnu dopu a mmenžatìa la patruna Ngicca presentàu tanta nna pignata te pesieδδi belli cucìuli, ddaveru sapuriti, e tanta nna fucazza te petate, china intra de ulìe nìure, chiàppari e stozze te prummitori. Ntra lli piatti nu rrimase nienti. La sira lu patrunu Tore fice purtare ntorna casu friscu te pècura, te quiδδu cussì, e!, ca de li buchi sculàanu cocce te sieru; e la patruna Ngicca mise allu centru de la tàula tantu nnu piattu te cepuδδe crute tagghiate a feδδe.

Lu mèsciu scarparu, omu de sperènzia, se menàu a llu casu e nn'àura stozza rossa la passàu a llu tescìpulu. A nnu ccertu puntu la signura ncignàu a ddìcere:

«Comu ete tuce sta cepuδδa; ete pròpiu sapurita. Sta razza de cepuδδe barlettane tene nna sapore ca te cconza la ucca». E, fradditantu, mmastecàa cepuδδa, puru cu fazza bìtere ca era ddaveru custosa.

Lu tescìpulu, uagnunceδδu senza muta sperènzia, mastecàa lu casu friscu, ma gnettantu menàa nn'ècchiu a llu piattu de le cepuδδe.

«Màngia, striu, e bìnchiate - ni tecìa lu mèsciu sou - Nu te mmanisçiare cu strafuechi; ane chianu ca nisciunu te sta' ssècuta».

E la patruna Ngicca cuntinuàa cu nsista:

«Cce be' bona sta cepuδδa! Tutte le sire nui ni mangiàmu pane e cepuδδe, ci ccònzanu lu stòmecu e ffàcenu bene a lla salute. Ulìa pròpiu cu lle ssaggiati!»

Lu tescìpulu ìa spicciata la pursione soa te casu e uardàa lu piattu te le cepuδδe rrezzandu l'ecchi: quasi quasi ncignàa cu nni nd'essa l'arma.

E la patruna Ngicca, mmastecandu e ssapurandu gnàu, gnàu, ncapunita nsistìa:

«Ete ddaveru sapurita e tene nna sapore stuzzecusa ca tice "ssaggiàtime, ssaggiàtime". Nzomma, a mie me piace e la trou puru leggera, tantu ca me face derruttare e deggerìre, mele e manna!».

Lu tescìpulu, a bia te sentìre la patruna, ni inne lu spilu e, curciùlu curciùlu, llungàu lu razzu cu ppìgghia nna feδδa de δδa cepuδδa. Ma prontu lu mèsciu ni tese nnu cuerpu sulla manu e lu retàu:

«Scrianzatu e marducatu ci nu sinti àuru, màngiate lu casu e lassa la cepuδδa, ca ni piace alla patruna!»