Ad oculos

L'acciprete te Lucugnanu foi chiamatu te notte cu dèsçia la stremunzione a nna carusa, perìccia, ca ìa stata pezzecata te la taranta.

Te pressa papa Caliazzu chiamàu lu Ronzu sacrestanu, pigghiàu l'ègghiu santu e, žandu lu passu, sçera a ccasa te cinca stia cu càsçia a ngunìa.

Quandu trasèra, la donna stìa stisa su llu liettu e facìa strèmeti e derliri, ma ppena idde la santa cruce se carmàu, chiuse l'ecchi e mpapagnàu.

Mentre lu saggerdote tecìa li 'Oremus' , lu Ronzu, ci te ste cose nde era pràttecu, cittu cittu ddummandàu a papa Caliazzu:

- Acciprete, te ddune ncignamu la sanctam unzionem?

Papa Caliazzu, ca ncora stìa alli 'Oremus', ni mise lu libbrettu sutta all'ecchi e cu llu tìsçetu ni musciàu lu ricu e la palora: «… ad oculos» (comu sia 'dagli occhi').

Siccomu, però, lu libbrettu era ècchiu, la pàggina nnu picca, anzi supèrchiu nsiata e nna tarla s'ìa ddevertuta cu sse rùseca paru paru la prima o te oculos, lu Ronzu, ca era puru nnu picca mmìrciu, leggìu…; llora zzeccàu la cutre, cu nna botta nde la scustàu e spugghiecàu lu culissi tundu tundu te la malata.

- Cce sta' faci, spergugnatu? Mmùcciala! - lu retàu papa Caliazzu - Uèi li frati soi cu ni bìnchianu te mazzate? Nu uardare, rebbambitu, mmùcciala!.

- Nu ll'àggiu fatta filu a mposta, cu nni sciuδδecamu. Signurìa cu llu tìsçetu m'à' musciatu cu lleggu; ièu àggiu lettu «ad …culos» e de stu puntu penzàa ca ìamu ncignare la santa unzione.