Lu matremòniu… nnu cimientu

Nc'era nna fiata lu barone te Tisçianu ca ìa passata la sessantina quandu se spusàu cu nna beδδa signurina, - quistu succetìa tandu e succete puru moi - nna carusazza suncira, bona, fucosa, cu tantu nnu piettu, benetica, e cu tantu nnu tafanaru a chitarra (tandu la furma te lu culu te le fìmmene se putìa sulu mmaggenare, datu ca cu lli estiri lenghi pieche pieche nu sse etìa).

Nnu giurnu la barunessa, sutta cunfessione, se cunfitàu cu llu patre spirituale, ca era papa Caliazzu, (a lli prieti te lu casale sou nu mbulìa cu dica li fatti persunali), se cunfitàu a nsecretu motu ca iδδa facìa mute peccate cu llu penzieri; pe ssèmpiu, quandu se sentìa sciuδδecare la… papùscia, sine lu prosu, iδδa se mmaggenàa quistu e st'àutru…, tante situazioni piacèvuli, tante cose belle, e se llusciàa de sula e de sula cutìa, percé marìtusa lu barone "nu fesçàa - pròpriu cussine tisse - e nu sunàa…"

Quarche tiempu dopu, rreuniti ntra lla spežarìa, lu barone te Tisçianu sçìa spiecandu alli amici - comu sia ci era nna custione punžata e scuperta te iδδu pe prima - ca lu matremòniu a ogne motu e a ogne manera era nna lotta cuntìnua tra maritu e mugghiere, e a tutti li sensi lu liettu nun era cca nnu campu te battàglia.

- Acciprete don Caliazzu, signurìa ci cunfiessi màsculi e fìmmene e sai li affari de li mariti e de le mugghieri, e canusci li fatti te le famìglie, lu matremòniu nun ete nnu veru cimientu?

- Certu, barone, - respuse papa Caliazzu - e mute fiate lu maritu, speciarmente quandu nu bete cchiùi giòene, tocca cu bàusa bandiera ianca!