L'AVVUCATU PIPPI DE RINALDIS

Quantu tiempu rretu, nnu doi sièculi e mienžu? Tandu lu casale te Caδδinu nu rriàa mancu a uettucentu abbetanti, quasi tutti culoni te campagna e servitori te palazzu te lu Signuru Don Giacintu Maria, Marchese e patrunu de lu paise e de tuttu lu fièu.

Persone lìbbere èranu sulamente li quattru prieti, li dèice mòneci dumenicani, lu speziale e lu miètecu; l'àutri… tutti servi muerti te fame!

Miètecu cunduttatu era tandu lu duttore don Ronzu De Rinaldis, spusatu e cu nnu fìgghiu chiamatu Peppinu. Quandu lu Ppinu se fice randiceδδu, sçìu prima alle scole te lu cumentu, poi, quandu ddentàu giuvinottu, partìu cu ba' stùtia a Nàpuli, la capetale te lu Regnu Burbònecu.

Dopu la làuria, lu Peppinu De Rinaldis ddentàu avvucatu de dirittu civile e de dirittu penale e felice e cuntente se nde turnàu a Caδδinu.

Ma allu paise sou nci rrumase pe picca tiempu, percé li Marchesi Castrumetianu ncignàra cu llu persècutanu. Pe quale mutivu? Pe llu fattu ca l'avvucatu facìa l'amore scusi cu lla Signurina Margarita, zia te lu Marchese neu, Don Gaitanu.

Comu se permettìa nnu sèmprice civile te sangu russu cu pretenda nna Marchesina, nòbbile te sangu blu? Cose te pacci, a ddu s'ìa rriatu!

E l'avvucatinu foi custrettu cu sse troa casa a Lecce e Donna Margarita, ca tenìa ntenzione cu sse nde fusçe cu llu nnamuratu, foi custretta cu sse fazza mòneca allu Cumentu te Santa Chiara te Nàpuli. Tiempi brutti e tristi, quiδδi te lu feutalèsimu! (te nde tìanu nn'itèa puru li numi dati alle strei, ppena nate: Ndulurata, Cunsulata, Crucefissa, Misericòrdia; o de li ngiuri: Saracheδδu, Spenturatu, Morte-parlante).

Don Pippi ddentàu nnu avvucatu te ciappa: brau, mutestu, unestu, pe nnienti amante te li sordi, facìa la prufessione pe passione et era canusciutu a ttutta la pruvìncia.

Li intidoi de sçennaru te l'annu 1799 lu Rre nèsciu, Ferdinandu IV tuccàu cu sse nde scappa te Nàpuli e cu sse minta a nsarvu, percé li Napuletani, iutati te li rivolužiunari francesi criàra la Reprùbbica. La nutìzia rriàu a Lecce alli uettu te frebbaru, diciassette giurni dopu, e li populani leccesi te pressa strazzàra la bandiera burbòneca e se ppuntàra a mpiettu la cuccarda francese.

Àggiu rrecurdatu sti fatti pe dire ca lu capu te li antiburbòneci leccesi era pròpiu lu paisanu nèsciu, l'avvucatu don Pippi De Rinaldis, amicu te lu generale leccese Oronzu Massa, ca pe llu prièsçiu te la raggiunta libbertà dèsera de unita lu segnale cu sse sònanu le campane e cu sse spàranu li fuechi.

Lu mese te li miessi li Sanfetisti nfetesciuti cumandati te lu Cardinale Ruffu turnàra a Nàpuli e alla capetale rientràra puru li Riali Burboni. E l'avvucatu De Rinaldis fose ncarceratu e chiusu ntra Forte a mare te Brìndisi.

Ma la rota te la stòria gira te pressa e ntorna lu 23 sçennaru 1806 lu Rre Ferdinandu IV tuccàu cu sse nde scappa te Nàpuli, e Rre te le Doi Sicìglie ddentàu Giseppu Bonaparte, frate te Napulione.

L'avvucatu don Pippi De Rinaldis te Caδδinu, comu cumpensu pe lle sufferenze patute e comu prèmiu pe ll'amore alla libbertà, fose numenatu Presitente te lu Tribbunale Civile te tutta la Pruvìncia. Morse a Lecce e allu campusantu te Lecce lu precàra, percé allu casale te Caδδinu li Castrumetianu la facìanu ncora te patruni.