SICISMONDU CASTRUMETIANU - Lu Casatu

Me cuntàa nònnuma, lu tata Luisçi 'Pagghiara', ca lu Marchese te Caδδinu don Dumènicu Castrumetianu e la signura Marchesa donna Anna Teresa Bàržamu ìbbera trìtici figghi! Benetica, sempre nn'arte facìanu? Pe dire la verità muti figghi li ccattàanu puru le famìglie de li artieri e de li ellani: muti fili signìficàa mute razze cu ffatìanu; e poi - pensàanu - muti fili suntu nna sicura pruetènzia pe lli siri ecchi.

Li cìnque figghi màsculi te li Marchesi, ene a dìcere Sicismondu, Chilianu, Giabatta, Ascàniu e lu Erricu, stìanu fissi fissi chiusi ntra llu palazzu ca parìa nnu veru castieδδu; nu scendìanu mai o, mègghiu, sulu la tumìneca scendìanu cu bàsçianu a missa; sçiucàanu te fra iδδi percé ntru llu paise nu nc'èranu àutri cumpagni te famìglie nòbbili comu a iδδi e mancu figghi te Signuri; cu ccine aìanu sçiucare, cu lli figghi de le cammeriere e de li servitori?

Effettivamente, tandu, a metà te lu sièculu passatu, Caδδinu era nnu casale chiusu ntra lle mure, cu lle case pe llu cchiùi a cannizzi e ìmbreci, e cu lle strate nfricciate, nnu paisottu cu 220 famìglie ca rriàanu a 1.500 ànime (e domila pecure!), tutti li abbetanti "figghi te muli", cussì èramu numenati, percé nui caδδinari simu stati sempre puntusi e capitesti!

Nc'era nna sula famìglia nòbbile, quiδδa te li Castrumetianu; ttrete sule sule te mienži signuri, li Arigliani, li Tòtaru Fila e li Trotta (li Cecala, li Lungordu, li Pedìu e li De Rau, pruprietari ricchi, èranu furestieri); nna seìna èranu li razzali: papa Ronzu, lu 'Panesi', lu 'Puδδi', lu 'Pasularu', lu 'Filottu', e quarche àutru; nnu centenaru e cchiùi èranu li artieri: zuccaturi, frabbecaturi, manìpuli, ntonecaturi e nquacenaturi, trainieri, cunzaturi, scarpari e sulachianielli, mesci d'àscia e falegnami, ferrari, ramari e stagnari, cconzalìmmure, felandare, ciuare; nc'èranu nna quindicina te putiari e de putiare (cchiù' mute le putèi de mieru cca lle putèi de cose te mangiare); tutti quanti l'àutri abbetanti facìanu li cuntatini: mmassari, sçiardenieri, cumenanzieri o sçiurnatieri, culoni, ellani, mmundaturi, pecurari e scarufaterra, servitori e lliccaculi.

Turnamu ntorna alli marchesini. Alle fiate δδi streiceδδi se nfacciàanu te le fenèscie te lu palazzu e uardàanu susu alla chiazza tirimpettu e betìanu tanti àutri strei ca sçiucàanu e se devertìanu, tutti squasati, iata a iδδi!: ccerti se secutàanu sçhiδδandu e mmenezzànduse, àutri currìanu chiantati a scancapìtete; sutta all'àrveru cchiù' rande te chiuppu nna murra de strei sçiucàanu a mantanefi e δδ'àutri a muntagna; sulla mancina, pròpiu te nanti alla capanda te la turre, lu Ntunùcciu de li Jachi, δδu pruticulu, s'ìa rrampecatu susu allu monumentu e se chiantàa a ncueδδu a rre Filippu a cavallu, e rrignandu e facendu mmosse facìa rìtere li cumpagni.

Cchiùi δδammera, poi, ssettate su lli scaluni te lu puzzu te San Dumìnecu o quate a nterra, le uagnuni fìmmene, nvece cu sse manìsçianu cu bìnchianu le capase e le menže de àcqua e cu sse nde tòrnanu a ccasa, δδe pertechine sçiucàanu a tuδδi o a cuntrici; cchiù' de coste, poi, allu friscu nnanti alla casa te lu patrunu Pietru 'Panesi', àutre strei sçiucàanu a campana zumpandu subbra a nn'anca comu tante puδδasceδδe.

Li marchesini, pericci, parìanu cìnque auniceδδi mpasturati chiusi ntra lli curti. Lu Sicismondu, però, rande te nna tecìna de anni, era lu cchiù' spiertu e decisu, pe nnu dire puru supèrchiu sçiuculanu: quandu sirsa nu nc'era, appena ni enìa inta, scendìa te lu palazzu, sçìa ttruàa lu Pippi e lu Rafelùcciu Arigliani, lu Pascali 'Puδδi', lu Pascalinu 'Pasularu', lu Ntunùcciu Tòtaru Fila, l'Ucciu Murrone, e de unita sçiucàanu a curùδδuli cu lli nùzzuli te percoche o a tizza cu lli nuci, o se facìanu nna partita a stacce, a bàzzeca e pizzecarieδδu, a spaccachianche o a cìcura cu llu curru (quisti èranu li sçechi de δδi tiempi). Li strei, tandu, sordi… mafissi e nizzi! a mpàuta pe tutta la semana nu purtàanu mancu nnu centèsemu, percé la dosordi ci aìanu auta pe mazzetta la tumìneca se l'ìanu spisa cu ccàttanu ruppini o semienti o fae e cìceri brustuluti.

Certu, quistu succedìa te èspera, quandu li Signuri Marchesi se curcàanu cu ffàzzanu marìsçiu. La matina, nvece, li marchesini, li cìnque frati e le cìnque soru (l'àure ttre fìmmene, pericce, ìanu già morte piccinne te picca anni) aìanu studiare; ma nu nc'era uccasione mancu cu bèssanu cu bàsçianu alla scola percé tandu a Caδδinu nu nc'èranu le scole prùbbiche, e le ležioni le facìanu a ccasa loru stessu: nnu giurnu sine e unu none salìa su llu palazzu nnu mònecu te Prucènziu e ni mparàa a llèggere, a scrìere e a fare le quattru operažioni: la prima quiδδa cu llu più (ca era la cchiù' facile), poi quiδδa cu llu menu, poi quiδδa cu llu per, e l'ùrtima, la cchiù' diffìcile - ci la stravìa! - quiδδa cu llu divisu. E li signurini, ci nu sse facìanu li còmpiti o ci nu sse mparàanu a mente la puesìa,… èranu cuerpi te rica su lle mànu - servu te Diu! - èranu pezzecate fuerti a nfacce ca te lassàanu doi mili russi cussìne (quista era l'usanza, tandu, te li maestri te scola!).

L'àuri strei, li fili te la pôra gente, èranu e rimanìanu gnuranti. È veru, nun esestìanu scole cumunali; ma puru ci nc'ìanu state, percéne li uagnuni ìanu pèrdere tiempu allu stùtiu? cu nfìlanu tabbaccu, cu ccògghianu e cu spàccanu le fiche, cu ddàcquanu le chiante de cucuzza e de marangiane, de sargenischi e de cucùmmeri, cu ùsanu la sarchiuδδa, cu fàzzanu li pecurarieδδi, nc'era besegnu cu sse mpàranu lu sellabbàriu? Cussìne raggiunàanu li siri loru: mègghiu li màsculi cu ba' ccògghianu rumatu e le fìmmene cu banu alli zippitieδδi cca ccu ppèrdenu tiempu allu lèggere e allu scrìere!