Nna manimmersa

Puru st'àutra l'àggiu cuntata a parecchi amici, ma me piace cu lla cuntu ogne fiata ci se dae l'occasione, percé me pare ngraziata; me capetàu pròpiu a mmie, quandu era uagnunceδδu, cchiùi te nna sessantina de anni rretu.

Ièu facìa la secunda crasse lementare: me rrecordu ca facìamu scola alla chiazza a ddu era prima la Casa te la Cumune, lu municìpiu .

Susu a llu libbru te le letture, a mmetà pàggina te lu tersu raccontu, piggiàu e nci sçìi biddi scritta pe scasulità la palora 'pizza'.

Prima prima ni la dissi ntru nna rìcchia allu cumpagnu miu de bancu, lu Pippi te mèsciu Affretu Pratu, e allu scularu Muntinaru fu (nn'amicu senza sire, ca tutti nui lu chiamaàmu Pippi te la Stella Sciδδa); poi ni la decemmu a tutti li cumpagni màsculi e ni sçìamu dandu pìzzechi alle razze; doppu ni musciammu δδa palora fiacca puru alla Giggina te la nunna Pìggia, alla Mmelùccia te lu Mmimmi te la Nnita, alla Livia te lu Nicola nfermieri, alla Pia te la Cetta e all'àure cumpagne fìmmene, e iδδe prima rrussèra, le capicalate, e poi rìsera, le tumitille, ma facendu le cuntenuse.

Dopu nna semana la signora Sarvatora disse:

- «Ragazzi, aprite il libro di lettura a pagina ventidue; leggiamo il racconto "Cena in trattoria"»

Sia ci aìa scuppiatu nnu fùrmene ntru lla crasse. Tutti basciammu la capu e tuccammu la pàggina cu lla punta te lu nasu; a tutti lu core se ttaccàu la manu e se mise a galuppare e a fare ttum ttum ttum a mpiettu.

- «Chi legge oggi? Leggi tu, Antonio Garrisi» - disse la signora maestra.

A mmie me zzumpàu lu core a ncanna e a rretu alla spina dursale me ntisi culare nna còccia te suture. Tutti li cumpagni de scola me uardàanu suttauècchiu, mpaurati puru iδδi, pe dire la erdate; ièu tussài, gnuttìi a bacante e ncignài a lèggere. Rriatu allu puntu a ddu tecìa: "Dopo aver preso posto, ciascuno ordinò una bella…" - me mancàu la uce, la palora nu bessìu, ddentài russu comu nn'ampa de fuecu e mmuttìi.

- «Antonio, leggi!» - retàu comu nna rraggiata la maestra e se cucchiàu e me musciàu le manu cu lle tìsçete stampagnate e mmenezzanti.

Cu nna uciceδδa tremulante liessi ntorna: "Dopo aver preso posto, ciascuno… ordinò una be…lla…" e ièu ntorna cittu, cu lla lìngua spritta e ttaccata allu celu de la ucca.

Ai, ai! La manimmersa nu lla mancu iddi. All'antresattu me ntisi nnu brusçiore comu nna usçatura alla facce mancina, a cquài, e l'ecchi me fìcera cìculi cìculi.

- «Leggi, Garrisi!» - sçhiδδàu la signora Sarvatora cu ll'ecchi spasçiδδanti, mentendu lu tìsçetu su δδa mmalurata te palora.

Ièu stìa cu scòppiu, però nu spurrài a chiàngere percé, benumale, l'Emìgliu Dicatèa, l'amicu te coste, ca era lu cchiù brau te tutta la crasse, me tese cu ll'ùetu intra a lli acanti e me disse:

- «Dai, Ucciu Spirdu, lieggi; ca sta 'pizza' ete quiδδa ca se màngia!»