17 - Li sette d'aùstu

Cu llu passare te lu tiempu lu rrecuerdu turnàa ognettantu a ccasa a δδe ttre caruse, le fìgghie te la Pulònia. Ete vera nna cosa: ca la lìngua batte a ddu lu tente tole - se dice. E lu Tore Babbu facìa ca tice…, ma lu penzieri ni sçìa alla cchiù' piccinna de le soru, alla Ngicca, a cquiδδa ci l'ìa uardatu intra a ll'uècchi a nnu ccertu motu e n'ìa risu, matonna cu ntenzione. E decise cu sse càccia.

Aìa statu alla festa rande: ìa ntisu ci era mègghiu la banda de Mandùria o la banda de Schinzanu; ìa passeggiatu sutta alla callerìa te la paražione, poi, pe la cunfusione, s'ìa mmasunatu a nn'àngulu te la chèsia e se cutìa lu strùsciu, mangiandu semienti, fae e cìceri brustuluti. Se ncaδδisçiàu cu spetta li fuechi, e, prima cu scurisca, se nde turnàu a llu paìse sou. Giacca se truàa cangiatu, se fice curàggiu e cu nna strina, ci aìa ccattata a mposta, se ncammenàu a δδa mmera a nnu luecu ci sapìa iδδu.

Quandu giràu l'àngulu te la strata, de lu largu idde la carusa soa tisa subbra a llu lemmetale te la porta, ca sta' pparlàa e sta' rretìa cu unu, nnu furese, mpezzatu te nanti. Lu Tore prontu e spiertu fice doi passi a rretu e doi te coste, cu nnu sse fazza ccòrgere, e, mentre se nde turnàa mmarutu te ddu ìa enutu presçiatu, ntra llu core ntise pe lla prima fiata a nvita soa comu nna puntura te nnu cheu, e a δδa carusa, alla Ngicca te la Pulònia, ni mandàu a dire su lle ale te lu ientu:

Nu squariàu mute semane lu Tore Babbu e turnàu ntorna a δδa casa.... E, quandu la sira se salutàu, se nde essìu nu comu nnu stràniu, ma comu zitu de la Ngicca.

Pe nna ttreìna d'anni lu Tore e la Ngicca fìcera l'amore; ogne sira iδδu se presentàa a ccasa a iδδa, ma sulu cu scarfa la sèggia, ca, quandu li ziti pigghiàanu postu, o la Lena o la Ràzzia nci se mpezzàanu a mmienžu, cu nnu ssìa, largu nde sia, ca li ziti scusi scusi se tìanu pezzecate o, mai sia, se freculàanu l'anca o, pèsçiu ncora, se tìanu nnu asu a pizzichilli o, facènduse l'ecchiurizzu, pigghiàanu ppuntamentu.

Poi rresulèra cu sse spòsanu, puru ci la soru rande, la Ràzzia, muta cuntenta nun era ca la soru piccinna se mmaretàa prima te le soru cchiù' rrandi. Tèsera la prumessa e fissàra lu giurnu de lu spunžalìžiu.