20 - Nna cureδδa de cucùmmeri

Sçiuscettu, m'àggiu ccortu ca ogne fiata ci toccu ccerti argumenti seri, ogne fiata ci parlu te muralità, te civirtà, nzomma de pubbremi tiffìcili, ncigni cu faci ali; picca a rretu à' spalangata tantu la ucca ca t'àggiu istu lu pendenieδδu te canna. Pensu ca forsi ci forsi ài raggione tie e ièu nu mme nde fazzu iabbu; puru a mmie me ncrisce cu descorru sempre sempre te cose sèrie.

Allora ete mègghiu ci cuntamu culacchi..., pe llu menu nci retimu subbra e nu facimu sangu àcetu.

Era lu tiempu te li miessi e nna matina lu Runzinu…, nu llu sai?, lu fìgghiu te lu Peppantoni Pezzanculu... Sine, lu canusci; be, vabbene: ci lu iti, iti ca te lu rrecuerdi... Nzomma, lu sçiardenieri te lu barone ìa ccuètu nnu cestinu te cerase prematèi, beδδe, carnuse, carmusine, ncora ùmete te acquatina, e le purtàu a rrecalare alli patruni. La barunessa le cratìu mutu mutu, ca èranu le prima te la nnata, e lu barune pe ddessòbbrecu disse: "Brau!" a llu sçiardenieri e lu cumpenzàu cu nnu carrinu d'argentu.

La cosa se inne a ssapìre e ni rriàu alla rìcchia puru te lu Tore Babbu, ca se rusecàu lu fìcatu pe lla ràggia e pe lla nvìtia. Passàu quarche ssemana, quandu ntra δδu gnègnaru te canìgghie te lu Tore spinchiulisçiàu nn'itèa.

«Ci pe nna cenquantina te cerase lu Runzinu se ibbe nnu carrinu d'argentu, ci a llu barone ni nde portu nnu panaru m'à rrecalare pe llu menu nnu tucatu».

Tittu, fattu. Nna èspera, a curmu de staggione, lu Tore Babbu enchìu tanta nna sporta te cerase, comu ccappàra... ccappàra, e, mienžu cangiatu, sçìu allu palazzu barunale.

Già le serve ni rìsera te retu. La barunessa nu ccratìu pe nienti le cerase, ca ogne giurnu l'aìa ssaggiate e se nd'aìa stuffata; lu barone, nvece, ccumpagnàu lu ellanu ntru llu salone, a ddu stìanu rreuniti li amici, e, cu lli fazza ddevertìre, ordenàu a llu Tore cu sse scala li càusi e li caržunetti. Perìcciu, putìa tire te none allu barone? e rrimase culinutu... Lu signuru chiamàu, poi, doi servitori e ni cumandàu cu nde llèanu li nùzzuli te le cerase e a unu a unu cu nni li fìccanu a... rretu a llu Tore.

Li presienti se sburdellàanu tenènduse li acanti pe llu rìtere. Lu bellu era ca lu ellanu se crepàa te risi puru iδδu, anzi cchiùi de iδδi. Lu barone maraegghiatu e curiusetusu se cucchiàu e lu demmandàu:

«Fessa ci nu sinti àutru, te sta' nfìlanu a nculu tanti nùzzuli, ca moi faci ngàgghiu, e tie sta' rriti nvece cu tte lamienti. Percéne, mìnchia, te sta' sburdelli de risate? Nu tte sta' ssienti nienti?».

E lu Tore Babbu:

«Sta' rriu percé sta' pensu a comu s'à ssèntere la Ngicca Cutrubbiera, ci crai ene cu nduca alla barunessa nna cureδδa te cucùmmeri!».