22 - Nnu veru rumpimientu…

De quandu lu Tore Babbu s'ìa nfittata nna chiesura a mmera a lla Cascettara, sçìa sempre straccu muertu e muertu te sennu. S'aìa žare a prima arba, quandu cantàa lu prima aδδu; ci ulìa cu nde càccia le spese e cu nde campa, s'aìa scurpunare ura dopu ura fena a llu mbrunire. E nun era custione de nfittu, li sordi te lu nfittu èranu fessarìa: se pacàa nna fiata all'annu lu nfittu. Lu bruttu, anzi nnu veru rumpimientu te scàtule, èranu li dritti e le rrecalìe obbrecatòrie ci li patruni de lu fondu s'ìanu rreservati: te δδ'àrveru te fica coppa ni spettàanu a lla signura do' panarieδδi te culummare e ttrete te fiche, nnu giurnu sine e ttrete none (e comu tenìa lu cuntu!); te δδe nèspule ni nde tuccàanu do' cestini. E cce sseccatura era, poi, lu sçire ogne dumìneca, quandu lu Tore ìa purtare a lli patruni, secundu le staggiòni, le site o le ficalìndie o li cutugni. E nu basta. Pe do' pecureδδe ci lu Tore tenìa ttaccate a llu piùlu intra a lle scerze, n'ìa fare parte de la recotta e de lu casu friscu e de lu casu te rattare; e ncora n'ìa purtare nn'auniceδδu te Pasca rande e nnu capune te Santu Ronzu, cussì, pe tratižione. Ei, signori mei, puru te δδ'àrverieδδu te sçìsçiule se nd'ìanu rreservatu nnu cestinu, "pe lla Bennardina mia, ca ni piàcenu tantu". E nu s'à spicciatu: ci puru l'àrveru te pignu pe δδ'annata nun aìa fattu fruttu, lu Tore ìa ccattare precisi tèice pigni e ni l'ìa purtare alla signura patruna, ca se ddevertìa cu face le pignunate. Però, pe lla verità, la patruna se la ddessobbrecàa: ognettantu ni rrecalàa quantu a nnu do' chili de menžazzita ccattati e ncartati e quantu a nnu quartu de cafè, te quiδδu buenu, già brustulutu ma ncora a mmacenare.

Reggettu lu Tore Babbu nu nde ìa filu pe δδa cazza te chiesura! A fiate ni enìa cu pensa ca ni nci ulìa nna cumpagna, cu llu pozza iutare alle servìzie, e lu penzieri ni sçìa a nna carusa ca ìa canusciuta tantu tiempu rretu, e ca puru nui canuscimu: la Ngicca, rrimasta cu lla Lena, la soru menžana; la Ràzzia, la soru rande, a llu frattiempu già s'ìa mmaretata cu llu mmassaru Iacu.

Lu Tore abbetàa a nna casa fore paìse; tenìa lu tettu a cannizzi e a ìmbreci comu tutte le case te li cuntatini; era fatta te nna càmmera e nna cucina. Intra alla càmmera de nanti nc'era lu stipone, nna càscia, quattru sèggie mpagghiate e nnu liettu a cestieδδi àutu àutu, percé sutta nc'ìa ccacciare lu capasune te le fiche seccate e la cureδδa te le freseδδe. La cucina nun era piccicca, però nci stìanu stritti lu focalire, la banchiteδδa e, a nn'àngulu, lu ranaru.

Lu Tore nun aìa mai utu lu piacere cu ìsçia lu ranaru chinu te llaùre; nnu sulu annu lu fice chinu a mmetà te pesieδδi, ma quisti, còccia lli pìgghia, se ttruàra crutèi, tuesti comu pallini te chiummu, e nu sse mmurbitìanu mancu tenuti a mmueδδu cu nna maniata te carbunatu. Nu nde endìu mancu nnu quartuδδu, ni rrimàsera tantu tiempu ca alla fine cu llu càutu ùmetu se concardàra e fìcera li falaùri. Ci l'à stramuerti, se uastàra te subbracchiùi e cinca mentìa pete intra casa se mpigghiàa: panza, anche, razze, spaδδe se enchìanu de foche e de panòcchie, e pe llu prutìtu unu se rattàa e se rranfàa a sangu.

A lla porta ca tìa all'ertu nc'era lu attàru, te ddu putìa trasìre e bessìre la mùscia, de giurnu e de notte, quandu ulìa, senza cu spastìtia nisciunu. Lu bucu te lu attàru era cchiuttostu largu, tantu ci nci putìa passare puru nn'aδδina; nci nd'era una ca ìa pigghiata l'abbetùtine cu ttrasa e cu nni fazza ttruàre a llu Tore nnu bellu uèu susu a llu liettu.

Già, pròpriu cussìne: cumprensione nc'era tra natura e animali e tra animali e uèmmeni; picca cunsiterazione, nvece, nc'era tra omu et omu.