52 - La missione

Foi dopu sti fatti ci lu vescu de Lecce chiamàu li Passiunisti de Nòuli cu ttènenu nna missione te quìndici giurni; nna missione tanta longa de motu cu ccunvèrtanu li feteli cristiani, ca ìanu ddentati pèsçiu te li sçiutèi, e le feteli cristiane, ca ìanu ddentate tante rètiche.

Percisà pote ntaressare, nc'ete de tìcere ca doi te li Passiunisti èranu saggerdoti de missa e de cunfessione, unu anzianu e ll'àutru cchiuttostu giòane; lu tersu era pecuezzu, ene a ddìcere mònecu senza missa e senza cunfessione, quiδδu ci a llìngua taliana se chiama 'frate convesso o fraticello'.

Lu pretecatore cchiù' giòane (se etìa te la cera cupa) tenìa la frunte rispulata e li musi strinti, era purtatu cu mpaùra li cristiani sulu cu lli fissa cu δδi uecchi puntuti e mmenezzanti; quandu la sira salìa subbra allu pùrpetu, era capace cu tte fazza ìtere le ampe de lu nfiernu, le ànime de li tannati e li tiàuli cu lli furcuni; tantu ca li presienti se rrunchiàanu e se facìanu piccicchi piccicchi susu a lli scanni, comu ci ulìanu cu sse scùndanu: ognetunu le mmenezzate te lu missiunàriu se le cretìa pe iδδu…

Nna èspera lu pretecatore sta' parlàa te le cose mmucate e sta' spiecàa quantu suntu gratiti a Domeneddìu li penzieri schetti e puliti e cquantu, nvece, ete periculosu catìre a tentazione e cummettìre ccerte cose fiacche e brutte.

De nnu fenescieδδu cu lla lastra te itru rutta, pìgghiàu e trasìu ntra lla chèsia nnu pàssaru cacanitu, ca ncignàu cu bola e cu ccurra tra lli pieti de le sèggie e l'anche de li cristiani. Nna ecchiareδδa, benumale, foi capace cu llu cchiappa lu aceδδu e lu scuse ntra lla mariola de lu tamantile. Lu pàssaru se sciuδδecàa ca ulìa sse llìbbera e ognettantu facìa 'ciu, ciu, ciu' e la gente retìa e nu mmentìa rìcchia a ccenca decìa lu passiunista de su llu pùrpetu.

Quistu nu putìa certu cuntinuare a pretecare a sta manera, cu tantu rreuetu; se spastitiàu e, stizzatu, retàu:

«Frati, mena meh!, cinca tene lu aceδδu, de pressa cu sse nd'àsçia a δδaffore!».

Tutti li màsculi, scuncertati, se žara e se nde essèra.

«Ma cce ànu capitu? Ulìa cu dicu: "cinca à pigghiatu l'aceδδu cu sse nd'essa δδaffore"».

Llora tutte le fìmmene se ntesàra e se nde sçera.

«Lumi santi de lu Signore, cce sta' succete? Cce ànu capitu? Ulìa cu dicu: "sulu cinca à pigghiatu l'aceδδu, cquài, ntra lla chèsia, se nd'à bessìre"».

A stu puntu nna seìna de biatille e de bižžoche, ca stìanu ssettate a prima fila, se žara e cu lla facce russa comu nn'ampa de fuecu catti catti se nde essèra.

Ntra lla chèsia nu rrestàu nisciunu; o mègghiu, no!, me curreggu: rrumase ssettatu sulu sulu a nn'àngulu scusu lu Niculinu Senzaquiδδa.

Sçiamu nnanti cu llu cuntu te la missiòne, senone girandu de cquài e utandu de δδai, spìcciu ca perdu lu filu te lu descorsu e me cuffundu.

Lu pretecatore cchiùi anzianu (se etìa ca tenìa muta sperènzia) era purtatu, nvece, cu ddae curàggiu alli peccatori, cu nni lassa nnu picca de speranza te sarvezza; tenìa la ucca sempre a rrisu, purtàa l'esèmpiu ca lu Signore ìa perdunatu puru la Matalena pentita e lu bonlatrone cunvertitu; ci era lu casu, puru cu tte llìbbera lu core te δδu nnùtecu de paura o te δδu trèmetu de tesperazione, te cuntàa nnu fattarieδδu o nnu culàcchiu, ca nde sapìa tanti o se li mmentàa pe ogne circustànzia.

Moi te cuntu cce ccumbenàu cu llu Coccu cconzalìmmure, nn'omu tantu buenu e caru ca, però, senza cu sse nde ccorga, astemàa puru quandu nu nc'era nuδδu besegnu. Mèsciu Coccu se genucchiàu cu sse fazza la santa cunfessione; lu saggerdote lu persuatìu ca le astime suntu peccati murtali, ca ogne astemazza era comu nna stellettata allu Core de Gesù. Lu Coccu rrumase tantu mpressiunatu, veramente, e cuntritu ca ni salèra le làcrime all'ecchi, a δδu ècchiu ci tenìa tanta de barba. Lu patre cunfessore se nde ccurgìu, lu capìu e nni disse cu rrècitanu de unita nna prechiera te penetènzia. Lu cconzalìmmure, ca te talianu nu ncucchiàa nnu erbu, repetìa palora pe palora a dialettu:

…cussine aìa utu ddìcere; ma a stu puntu mèsciu Coccu, pentitu, se ntise nnu nnùtecu a ncanna e nu sse fetàu cu dica le lùrtima palore "ni duna lu core".

Eccu allora, lu patre missiunàriu tantu sensìbbile e ttiènneru de core nde ibbe pròpriu dògghia e, cu llu cunforta e cu nde lu spònia nnu picca te δδu sorte te dispiaceri, ni mpuggiàu la manu su llu musçu e ccu lla ucca a rrisu ni disse:

« Scemu miu, nu te mpaurare; lu Signore te perduna comu perdunàu puru l'apòstulu Pietru ca lu rennecàu ttre ffiate; dai, ripeti cu mmie, ntorna:

Mmaluratu, cce bera curiosu e schersusu δδu missiunàriu!

Lu tersu passiunista, lu mònecu pecuezzu, era tuttu faci faci, facìa l'ecchiurizzu alle caruseδδe, rrignàa le ecchiareδδe, e cu lla facce simpatecazza e cu lla ucca de zùccaru riuscìa cu sse fazza rrecalare te la gente ccèncata ddummandàa, cu tuttu lu core.

A ncapu a nna semana sti ttrete Passiunisti se fetàra cu cunvèrtanu tutti, fìmmene e màsculi, uagnunceδδi, carusi e becchi, puru mèsciu Nzinu teu, puru lu Pascalinu sçiutìu, puru la Meca maca. Addirittura don Diecu, lu miètecu, dopu nnu quarantale ca nu ssalìa li scaluni de la chèsia, catìu genucchiuni nnanti allu passiunista e ose cu sse cunfessa.

«Patre, àggiu cummessu stu peccatu, quistu, quistu, e st'àutru, peccati cu lla mente e peccati cu lle òpere».

«E poi, fratellu?» - lu ncuraggiàu lu cunfessore.

«Quisti, quisti e poi st'àutri; ma prumettu, patre, ca peccati nu nde fazzu cchiùi».

«E astime, brutte astime nda ditte?» - ni essìu nnanti lu saggerdote.

«Sine, àggiu puru astematu».

«Quantu, figliolu? Lu cunfessore à ssapìre li mìnimi particulari, te motu cu pozza poi ssegnare la giusta penetènzia. Quantu à' astematu?».

«Tantu».

«Mutu?».

«No».

«Picca?».

«No».

«Quantu, nsomma?».

«Lu giustu, patre».

«Quandu?».

«Quandu nci ulìa» - respuse don Diecu (ca sta' ncignàa cu bùnchia a ncuerpu) e lu peccatore se llebberàu l'ànima de nnu pisu pesante nna sarma.

Però, pericci iδδi, li do' saggerdoti passiunisti tutte le ure de la matina e de la èspera chiusi ntra lli cunfessiunili le passàanu, cu ccunfèssanu e cu danu la ssurvezione, percé li pentiti sulu a lli patri furestieri preferèra cu schiattèδδanu li peccati loru; peccati tanti e ressi ca ìanu fattu chiàngere δδi picciccheδδi de Angeli Custoti!

E li prieti paisani nu nde èranu sçelusi te sta cosa, anzi, pe lla verità, ncignàra cu sse prèsçianu e cu ddengràzianu li missiunari, ca manu manu ni sta' cunsegnàanu belle pulite le ànime de li paricchiani loru.

Comu cumpensu li Passiunisti de Nòuli ìbbera la sutispazione, pe sta cosa ntantu tra lla nvìtia e la sçelusìa te li saggerdoti nustrani, cu mmàndanu nnu giurnu sine e unu none nnu sciarabbà chinu de rrobba e de lemòsene a Nòuli, a llu cumentu loru.

Alla fine te la missione, propiu propiu la notte de lu sàbbatu, alla prucessione de la penetènzia se idde nnu spettàculu mai istu prima: tutta la populazione annanti alla chèsia, tutti estuti a nnìuru li ecchi e le ècchie, comu a lluttu strittu (ci sape, poi, percéne?); tutte estute a iancu le caruseδδe, comu erginelle; e le piccinne estute comu angelieδδi cu ll'ale. Muti màsculi, poi, squasati, a ncamisa, cu lle màneche nfurdecate, pe votu tenìanu a mmanu le ugghine o le currìsçie, e, quandu se nculunnàra a rretu alla Cruce nuta senza Crucefissu, ncignàra cu sse llìssecanu le spaδδe e lu piettu e cu sse fàzzanu l'anche a sangunazzu.

«Signore Iddio, perdonate queste anime, vostre creature» - decìanu retandu li Passiunisti.

«Signore, perdùnani - rrepetìanu chiangendu li pentiti - Li cori nesci s'ànu rreccuti te le cose de Diu».

«Dio Padre, salvate queste anime benedette».

«Sàrvani, Signore! - cantàra a para uce tutti quanti li presienti - Sàrvani ca te nde simu ricanuscenti!».

Aìa passata la menžanotte quandu lu saggerdote cchiùi anzianu cu llu razzu žatu tese alla folla la santa benetezione, pròpriu quandu le luci de li lampiuni te la chiazza chianu chianu se sçìanu stutandu...